Ikipe ya Musanze mu Bagore na Rwamagana mu Bagabo mu mukino wa Goalball, zegukanye Irushanwa ryo Kwizihiza Umunsi w’Intwari ryakinwe mu mpera z’icyumweru, tariki ya 3 Gashyantare 2024.
Iri rushanwa ryabereye ku bibuga bya Basketball bya Kimironko, ryari ryitabiriwe n’amakipe yasoreje mu myanya ine ya mbere mu bagabo n’abagore, mu mwaka w’imikino ushize.
Mu bagore, Musanze yageze ku mukino wa nyuma itsinze Rwamagana ibitego 5-4 naho Rubavu itsindwa na Ngororero ibitego 3-2.
Uku kwitwara neza kwa Musanze kwakomereje no ku mukino wa nyuma, biyihesha Igikombe cy’Intwari cya 2024 nyuma yo gutsinda Ngororero ibitego 4-2.
Umwanya wa gatatu wegukanywe na Rubavu yatsinze Rwamagana ibitego 4-3.
Mu bagabo, Gisagara yageze ku mukino wa nyuma itsinze Musanze ibitego 3-1 naho Rwamagana inyagira Ngororero ibitego 5-1.
Mu mukino wa nyuma utari woroshye, Rwamagana yegukanye Igikombe cy’Intwari itsinze Gisagara ibitego 5-4.
Umwanya wa gatatu watwawe na Ngororero yatsinze Musanze ibitego 5-4.
Kapiteni wa Rwamagana yatwaye igikombe mu bagabo, Uwihirwe Ange, yavuze ko bishimiye kwegukana iri rushanwa kuko na bo bisanishije n’intwari.
Ati “Muri rusange, buri gihe irushanwa riba rikomeye. Iyo wagerageje gukora ibyo watojwe, ibyo usabwa ugatsinda, urishima birenze. Kuba ari iry’Intwari, byo birarenze, dusa n’abagaragaje ko turi intwari.”
Umuyobozi Mukuru ushinzwe Iterambere rya Siporo muri Minisiteri ya Siporo, Rwego Ngarambe, yashimiye abakinnyi bitabiriye iri rushanwa, abasaba kubyaza umusaruro amahirwe yose babona.
Umunyamabanga Nshingwabikorwa w’Urwego rushinzwe Intwari z’Igihugu, Imidali n’Impeta by’Ishimwe (CHENO), Déo Nkusi, yavuze ko nubwo benshi mu bakina uyu mukino wa Goalball bafite ubumuga bwo kutabona ariko bagomba kumva ko bashoboye.
Ati “Umuntu wese arashoboye, afite icyo yakora kandi akagikora neza, kikamuteza imbere, kigateza imbere n’igihugu. Umurimo ni ingenzi. Ni byiza kandi kurangwa n’ubupfura.”
Ikipe ya mbere muri buri cyiciro yahawe igikombe n’amafaranga, aba ari na ko bigenda ku ya kabiri n’iya gatatu.
Goalball ni umukino ukinwa n’abafite ubumuga bwo kutabona ikipe iba igizwe n’abakinnyi batatu, wavumbuwe mu 1946 n’Umunya-Australia, Hans Lorenzen, afatanyije n’Umudage Sepp Reindle.
Amwe mu mategeko agenga uyu mukino harimo ko abafana bagomba kuba batuje.